| Пн, Сен 5, 2022 10:44pm [Аноним] - 609 d back | ↑↓ |
|---|
Ліз Трас абраная кіраўніцай Кансерватыўнай партыі Вялікабрытаніі і ўзначаліць урад краіны — фармальна гэта ёй павінна прапанаваць зрабіць каралева. Трас вядомая як "ястраб" у знешняй палітыцы — у тым ліку па сваёй жорсткай пазіцыі ў дачыненні да Крамля і неабходнасці і далей падтрымліваць Украіну. Еўрарадыё ўспамінае, што спадарыня Трас казала пра Беларусь.
Пра свабоду і рэпрэсіі
Трас узначаліла МЗС Вялікабрытаніі ў 2021-м, гэта значыць непасрэдна ў пачатак вострага палітычнага крызісу ў Беларусі высокіх пасад яна не займала. Але адразу пасля прызначэння "беларускую праблему" бокам не абыходзіла.
"У адрозненне ад сваіх дэспатычных кіраўнікоў беларусы — сапраўдныя дэмакраты. Зноў і зноў мы бачым, як простыя грамадзяне рызыкуюць усім, каб адстойваць свае правы і падтрымліваць полымя свабоды. Як сказаў старшыня Беларускай асацыяцыі журналістаў Андрэй Бастунец: "Сёння нас закон не абараняе. Сёння мы абараняем закон", — пісала Трас у артыкуле для The Sunday Telegraph 14 лістапада 2021-га.
Ліз Трас — новы прэм'ер-міністр Вялікабрытаніі
Праз два тыдні Трас падымала тэму Беларусі на сустрэчы з кіраўніком расійскага МЗС Сяргеем Лаўровым і "заклікала міністра Лаўрова выкарыстаць уплыў Расіі, каб заахвоціць рэжым Лукашэнкі ўступіць у перамовы з лідарамі апазіцыі пры пасярэдніцтве АБСЕ".
Тады ж, у снежні 2021-га, Трас сказала:
"Вялікабрытанія верыць у свабоду слова, свабодную прэсу і свабоду асацыяцый. Мы не адвернемся, пакуль прадстаўнікоў апазіцыі, журналістаў і актывістаў працягваюць збіваць, саджаць у турмы і забіваць або прымушаць да выгнання", — заяўляла яна і абяцала прыцягваць да адказнасці ўсіх вінаватых у парушэнні міжнароднага права.
Пра міграцыйны крызіс
Узначаліўшы міністэрства ў разгар міграцыйнага крызісу на межах Беларусі і краін ЕС, Трас выказвалася і па гэтай праблеме.
"У Беларусі гэты старанна спланаваны крызіс ёсць спробай адцягнуць увагу ад пералічэння агідных дзеянняў і парушэнняў правоў чалавека, якія ўжо здзейсніў рэжым", — пісала яна ў тым жа артыкуле для Sunday Telegraph.
Борыс Джонсан можа зрабіцца генеральным сакратаром NATO — The Telegraph
Акрамя таго, Трас заяўляла, што адказнасць за міграцыйны крызіс нясе і Расія, і яна "павінна аказаць ціск на беларускія ўлады, каб яны спынілі крызіс і ўступілі ў дыялог".
Пра саўдзел у вайне
"Рэжым Лукашэнкі актыўна дапамагае і падбухторвае да незаконнага ўварвання Расіі ва Украіну, і яму давядзецца адчуць на сабе эканамічныя наступствы сваёй падтрымкі Пуціна", — напісала ў сацсетках 1 сакавіка Трас.
Так яна анансавала новы пакет санкцый з боку Вялікабрытаніі супраць беларускіх уладаў за ўдзел у вайне. Пазней яны пашыраліся некалькі разоў.
|
|
